العاصفة الكاتبة شيماء محمد الفصل ١٤
كشړ ايه ما تعرفش مش اديتهولها!
كريم بتعب أيوة اديتهولها بس بعدها مشيت معرفش رأيها فيه ايه !
مؤمن باستغراب طيب ليه ما استنيتش تعرف رأيها ! اوعى تكونوا اټخانقتوا ! لا بجد أنا تعبتلكم !
كريم حكاله اللي حصل ومؤمن باستغراب تخيل برضه أنا كنت فاكر زيك كده إنهم بس عمال نظافة أو بتوع أمن مش أكتر
كريم اتنهد المنظر والله يا مؤمن يحزن كمية عري واختلاط لا تتخيلها .. راجل بيغسل لواحدة شعرها ! ولا مقرب من وشها بيعملها الميكاب ولا اللي بيساعد واحدة بتلبس .. حاجة كده غريبة .. تحسهم مش رجالة أصلا .. حتى لما بيتكلموا تحسهم ما فيهمش خشونة الراجل فعلا .. تحس ست بتكلمك
كريم ربنا يهديهم جميعا
مؤمن بعد ما سكت فترة بص لكريم بفضول لو ما لبستش الفستان هتعمل ايه !
كريم بهدوء بنسبة ٩٥٪ أصلا مش هتلبسه عندا فيا أو علشان توريني إنها مش هتسمع كلامي وإني ما أحطش أمل كبير إنها تتحجب أصلا
مؤمن بحيرة برضه هتعمل ايه ساعتها !
كريم من جواه عارف ايه هي النهاية بس لسة مش عايز يصرح بيها دلوقتي يمكن يكون في أمل فبلاش هو يهده !
بالليل ناهد دخلت عند كريم اللي كان بيجهز وساعدته حبيبي جبت هدية لخطيبتك
كريم بابتسامة اه يا قلبي جبتلها
طلع العقد وراهولها وعجبها جدا وفضلت تدعيله ربنا يسعده ويقدمله اللي فيه الخير له .........
اتحركوا كلهم على مكان الحفلة ونزل حسن وناهد ومؤمن فضل مع كريم لحد ما يركن عربيته .. دخلوا الحفلة الصاخبة نوعا ما
مؤمن بعينين تايهة ياتري عمتو فين هي وعمو حسن
بص لكريم اللي عينيه كانت ثابتة في مكان وهو تابع نظراته وهناك شاف ملك بفستان
ملك تعمدت تلبس الفستان ده علشان تفهم كريم إن دي طبيعتها وهي مش هتتغير .. كانت منتظرة وجود كريم بفارغ الصبر وعايزاه يجي بسرعة وتشوف رد فعله ! هل ممكن ينفعل عليها قدام الناس ! هل هيسكت ! هل هيتقبلها بالشكل ده ! مابقتش عارفة تخمن رد فعله ايه ! هي عايزة تحطه امام أمر واقع وبتبرر لنفسها إن مهما يحصل هيفضلوا مع بعض
كوكي قربت منها وهمست كريم وصل هتعملي ايه
ملك بابتسامة مصطنعة ولا حاجة هشوفه هو هيعمل ايه
كوكي باستغراب ولو جه وجرجرك من شعرك !
ملك بصتلها پخوف نوعا ما بس حاولت تطمن نفسها لا ... لا يا بت ما يعملهاش.. هو مش همجي أصلا .. بعدين منظره وسمعته قدام الناس
كوكي بتريقة امال مين اللي جرجرك برا الكوافير النهاردة ! ولا بيتهيألي !
ملك بتفكير ده مختلف .. الكوافير ماكانش في حد يعرفنا لكن هنا عملائنا وموظفينا وأهله وأهلي لا لا .. لا يمكن يعملها لا ..
مؤمن باستغراب مش هتروح تسلم عليها على الأقل !
كريم بصله هتصدق لو قلتلك ماليش نفس أصلا .. هنقعد شوية ونمشي
راحوا ناحية عيلته وناهد استغربت وجود كريم حبيبي مش هتروح لخطيبتك !
كريم بصلها بزعل هي حسته ما تشغليش بالك يا أمي !
